Świynta to je piykny czas, ale roz dwa idzie w tyn czos szmatom łod kobiyty nachytać, bo roboty moc i nerwowe te nasze gospodynie fest. Wert jak łone tak se uwijajom z tom przedświontecznom robotom, pora starych wicow im łopedzieć toż suchejcie;
Dwóch bajtli spyndzo świynta Bożego Narodzenia u starzikow, na dziyń przed wilijom, krotko przed spaniym klynkajom do wieczornego pociorka a tyn modszy śnich zamias żykać ryczy na cołki pysk. Panie Boże, chca nowe kołeczko, chca nowe wojoczki, chca nowy bal, chca… Na to łodzywo se tyn starszy, coż tak ryczysz, Pon Boczek niy je guchy – Pon Boczek niy, godo tyn modszy ale starka ja.
***
Jorguś zapol choinka!
A światełka tyż?
***
Mamo, mamo – choinka se poli!
Niy godo se poli yno świyci.
Mamo! Gardiny se tyż świycom.
***
Po jakymu Mikołoj se cołki czos śmieje? Bo jako jedyn z niewielu zno adresy łod wszyskich niegrzecznych dziołchow.
***
Pyto se frelka swoigo kawalera, co byś pedzioł jak by my wziyni ślub we świynta Bożego Narodzenia? Coś ty, łodpowiado, poco se momy psuć nastroj.
***
ksiondz chodzi po kolyńdzie, dzwoni do dźwi. Czy to ty aniołku? Pyto śpiywny kobiycy sopran dobywajoncy se zza dźwi. Niy, ale my som z ty samy fyrmy.
***
We wilijo chop jedzie forom, z boku leci pies. Koń je niy usuchliwy i kyns lynia, toż go chop biczym po zadku poczynstowoł, na to koń – jeszcze mie roz praskniesz biczym, to pudziesz piechty. Chop pierońsko zaskoczony tom reakcjom konia, godo, jeszczech tego niy widzioł, coby koń godoł, a pies nato, jo tyż.
***
Koniec stycznia w Niymcach.
Halo Stefen – downo po świyntach a ty dopiyro tera choinka do dom niesiesz? To niy je ważne Helmut kedy boły świynta, ważne, że choinka je z promocje.
***
Mało Jadwisia kładzie se do łożeczka i godo do swoigo starzika – jak jutro se łobudza to chciałabych mieć kole siebie piykno blond laleczka – jo tyż dziecko – godo starzik.
Słówka wybrane;
Pociorek —- modlitwa, modlitwa różańcowa.
Kołeczko —- rowerek.
Wojoczki —- żołnierzyki.
Bal —- piłka.
Gardina —- firanka.
Piechty —- pieszo, na piechotę.
Autor: Tadeusz Puchałka
Dodaj komentarz