Moczka Po Gyrotowsku. Coby tyn deser boł godny Świont Bożego Narodzynio trza do niego dać…

fot. Pixabay.com / Orzechy włoskie. Jeden ze składników moczki wigilijnej.
fot. Pixabay.com / Orzechy włoskie. Jeden ze składników moczki wigilijnej.

Dejcie pozor: Krałza – abo dwie kompotu ze podzimek, tytka suszonych śliwek może byść ze 20 dkg. Jak bydzie wiyncy to se nic niy stanie, piernika miodowego 20 dkg. Może byść 25, to zależy wiela tego mo byść i do wielu ludzi to robiymy (wiela pyskow bydzie przi stole).

Krałza kompotu z jabek, do tego łowoce z ciepłych krajow tak zwane bakalie, wszyskigo dowomy wedle uznanio i ilości pijyndzy w potrmanyju.

Niy śmiy braknońć takich łowocow jak mandle – kere muszom byść pokrone na konski, dali dodowomy tytka abo dwie ruzynkow, łorzechy włoske, kere muszom tyż byść poczaskane na myńsze konski, to skuli starszych domownikow co niy majom zymbow, dali niy śmiymy zapomnieć ło figach, mom na myśli łowoce a niy babske galotki, fyrzichy (morele abo brzoskwinie), datle (daktyle) – pamiyntejcie bez tych dobroci moczki niy bydzie yno kepski kompot..

Dejcie pozor: We gyrotowski moczce niy ma wieprzkow (agrestu). Ździebko mogymy dać citrony i pomarańcze – kapka, tak yno na smak (wedle uznanio). Tyn cołki miszong, musi byść pokrony na drobne konski, wciepujymy to do garca i warzymy.

Dejcie pozor, bo to co tera powiem je fest ważne, kożdy łowoc warzymy osobno skuli tego piec musi byść wielki i garcow moc, do kożdego garca wlywomy ździebko wody. Jak już to wszysko momy uwarzone, to już kożdo gospodyni musi wiedzieć kedy to wszysko łodstawić, to wtedy wszysko wlywomy do jednego garca.

Tako ważno uwaga: Nejlepi w tym czasie dejcie chopom jake zajyńcie, niech z bajtlami strojom goik, bo przesmrodzanie chopa wele pieca nie wroży niczego dobrego, może prziść do swady, a to przeca Wilijo, wadzić se je zakozane (nie wolno).

Tera rozpoczynomy warzyć piernik, zaś we łosobnym garcu, jak se śniego zrobi klajster, to se to przesiywo bez sitko, te wodnite wlywomy do garca ze łowocami i miyszomy. Na koniec se robi zosmożka ze masła, dejcie pozor, coby niy przipolić, bo jak to zrobiymy to cołko robota pieron szczeli, ta zosmożka tyż muszymy przesioć bez sitko, prosto do garca, coby niy boło klompow, wszysko wartko miyszomy. Idzie dodać jeszcze cukru ale yno do smaku, je tam tela dobroci, że jak niy domy pozor z tym prziprawianiym, to mogymy yno wszysko sfajfczyć. Tak narychtowany deser, łodstawiomy do chłodnego miejsca, koniecznie daleko łod dziecek i chopow, bo do wierzerze wszysko zeżerom i nic niy złostanie do małego Jezuska.

Ja – miarkujymy z tego, że moczka po gyrotowsku to bomba kaloryczno. Mode frelki łoszczegom przed utratom figury na dugi czas, żodyn ani mody ani stary co już mo niyjake problymy z wontrobom, musi se spodziywać ataku po spożyciu ty dobroci, ale to se przeżywo yno roz w roku. Na szczyńście ludowe dochtory wymyślyły Rapacholina kero polecom zażyć przed kożdom Wigilijnom wieczerzom na Ślonsku. Czego se to skuli narodzin Chrystuska niy robi pra. Życza wszyskim smacznego i zaznaczom, boł to przepis na moczka gyrotowsko, kero koniecznie musi byść tako gynsto coby prawie łyżka we asjetce stoła. Je sam u nos na tym kochanym Ślonsku tak, że już wieś dali, moczka wyglondać może nikej blank inaczy…

Som take wsie, co do tego wszyskigo dodowo se gymiza, jodech ale cobych boł tym smakym zachwycony, niy moga pedzieć. We wielu miejscach moczka wyglondo jak kompot, taki powiydzmy bardzi wodnity, dobry sposób bo wtedy je tych dobroci wiyncy, ale to już nie po gyrotowsku.

Ja – to by my mieli przepis na moczka załatwiony. Już niydugo powiym wom ździebko ło makowkach, tyż w naszy mowie, choć zaś se naraża na opinie jakich to niyprofesjonalny, bo po ślonsku godom i pisza. Ja docie wiara, że tak je? Momy ci sam takich filozofów dostatek, ale nic tam, my swoje wiymny i po swojymu tyż godać bydymy. Pocieszajonce je yno to, że ci co tak godajom i nos łobrażajom, nigdy niczego niy napisali, ani po polsku, ani po inkszymu, łażom po tym świecie po próżnicy i luft choćby tyn smog zatruwajom. Ja i jeszcze jedno – jak bydziecie robić ornong na świynta to niy zapomnicie ze łaziynek wogi wyciepać, bo te urządzenie poradzi wom cołke świynta zepsuć.

Autor: Tadeusz Puchałka

Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*